【裙褂出嫁懶人包】新娘必讀4大貼士|唔識襯裙褂隨時變大媽

分類: 
婚禮籌備
2018年09月17日 10:25:41

個個結婚都會著裙褂,其實件件都有不同特色,加上裙褂喺 2013 年成功列入「香港非物質文化遺產」梗係有好多知識要知啦!想做個醒目又賢淑嘅新娘子,快快手租到心儀裙褂之餘,仲可以拋下書包?姊妹們!呢個裙褂懶人包絕對要 Bookmark 呀!

 

1. 要識分顏色

裙褂的顏色選擇上,大致可分兩種色。一種偏向金、一種偏向紅。你地咪以為好似平時去買衫咁,一套褂分兩種色呀!其實好多老鋪租嘅傳統褂都係人手一針一針咁將金銀線繡上紅布上面,如果金銀線密度愈高,多到見唔到紅布,就感覺愈豪華,咁價錢當然會貴啲,不過姊妹們記得件件都拼上身睇下襯唔襯自己,好似我咁,揀套太金就即刻升一 Level 變奶奶架喇哈哈。

 

2. 裙褂5大種類

揀好自己鍾意嘅顏色,就要知究竟入面仲有咩款揀。通常去到租褂嘅鋪頭,姐姐們都會問你要邊款褂!喺呢個時候,你地就要緊記呢堆名喇!務求以最短嘅時間hold到心儀靚褂,咁就可以靚靚出嫁啦!

種類程度:由最金到最紅

「褂皇」:金銀線密度100%。金光閃到見唔到紅布。

「褂后」:金銀線密度85-90%。金光閃,但間唔中都見到紅布。

「大五福」、「中五福」、「小五福」:金銀線密度60-80%。金銀線同紅布比例相對比較平均。

以下「中五福」VS「大五福」:

而過去亦有興過潮褂,一樣都係紅布做底,不過就會加上其他新意,如似係水晶同珍珠去裝飾,領位亦比傳統褂高。

 

3. 裙褂圖案寓意

當時我租褂嘅時候,件上衣揀平腳定花邊腳呢個位我停留左好耐。你哋明啦,新娘子心大心細係一定㗎嘛嘻嘻,不過如果知道埋每個圖案背後嘅寓意,又會唔會令你哋嘅目標明確左呢?喺裙褂上面見得最多既龍同鳳係代表龍鳳呈祥、牡丹就代表富貴、而出現喺褂皇嘅五彩雲紋就比喻為美麗、無憂無慮、超凡脫俗嘅新娘子。

而普偏多新娘子揀嘅大、中五福,上面就繡左五隻福鼠,寓意福、祿、壽、喜、富。「五福」喺古代仲代表長壽、富貴、康寧、好德、善終,加埋就構成左幸福美滿既人生。而我最後就揀左平腳,因為係代表婚姻路四平八穩。

 

4. 裙褂2大禁忌

好多新娘子試完褂之後,都想前前後後影幾多張相比較下究景褂皇好定大五福好,不過記得留意咪整套著哂上身呀!因為傳統黎講,裙褂一生人只會著一次,如果當日試褂著左一次,大日子又著就真係大吉利是喇!!!所以記得著裙褂果陣要將褂同裙分開試。

另外好多女仔平時都有噴香水嘅習慣,但記得結婚當日就要忍下手喇!因為人手繡嘅褂一般唔會拎去洗,而裙上嘅金銀線亦會因為香水嘅物料令顏色產生變化,導致損壞㗎!

撰文:駐場Blogger - 人妻搜記

圖片來源:駐場Blogger - 人妻搜記、明星結婚發相